好在有臭B~

失業既日子真係好易會令人胡思亂想, 日日訓醒都要整一下心情,
家人問你一兩句野, 我就會自然好敏感咁覺得佢比緊壓力我 (其實以我媽性格, 佢真係比緊壓力)

但比壓力都冇用, 搵工冇得急,

慶幸有女朋友在, 佢講話只要每日我都有上網搵過工, o岩就SEND, 已經做左我應該做既野~
餘下時間, 玩又好, 休息又好, 點都得~

病了~~

星期日同舊同學去燒野食, 唔知點解覺得佢地好似表面好好傾, 好好笑, 但係個個都好似戴左個面具咁, 連食野都唔食得開懷~
剩係得我係咁玩野, 蒜蓉牛扒吐司, 煙肉三文治(厚面包自已拎膠刀切薄), 豬頸肉包加茄汁等等~
佢地見到我咁玩就眼望望話我好心機, 但係自己又照係咁燒~~~食~~~

始終唔夠暢快, 唔夠開心~

人大左(我講佢地咋)咪係就會咁架呢, 好似要刻意掩飾自己既童真, 好似好怕比人話細路~
我又唔怕喎, 我擺明仲有童真, 有創意, 我好肯定, 果日燒野食食得最開心果個一定係我~~
只不過有D遺憾係得我一個玩, 如果成班都係咁, 一定會仲開心~

可能我太投入玩野食, 一個唔少心, 中左招, 依家好似病緊~~~
唉~~~~~~~~~~~~~~~~~~~~~~~~~~~~~~~~~~~~~~~~~~~

一試無妨~

行錯左, 都有錯既經驗得到~

行o岩左, 皆大歡喜~

咁易分到對錯, 世界就不會那麼不公平~

"要是真的命運主宰了一切 、生命只依照命運訂好的軌跡運行 、生命的意義又在那呢??"

在網上一個blog看到有人問一句
"要是真的命運主宰了一切 、生命只依照命運訂好的軌跡運行 、生命的意義又在那呢??"

看來那位人仕開始有所覺悟, 依我所見, 命運是真的主宰了一切, 每個人亦是只依照命運訂好的軌跡運行, 但是人可以選擇的是把握命運安排給你的機會, 好時便把握機會好到盡, 差時亦不可沮喪, 應守株待兔~~

只要你相信, 兔一定會出現~

在下曾懷疑過, 我口中經常所提及的"命運"是否正是基督教中"常與你同在"的神 / 耶穌基督?
我曾學基督徒般誠心禱告, 希望"衪"可以為我的生活帶來一點轉機, 但我証實, 衪並沒任何回應, 或許衪捨棄我(雖然衪聲稱只要信便可感受到衪), 既然這樣, 我更慶幸自己不用每年每月每日每時每刻都要讚美一個普遍人都感受不到的"存在"~~
而我相信的"命運", 他不是甚麼"超自然力量, 我認為他是一個mechanism, 軌跡大致上已安排好, 但你越想反抗, 便會越痛苦, 順從安排, 把握機會, 便必可成功~~~

我因機玄之下知道自己一直都在行緊"辛苦白做"的運, 連失業亦一如所料, 而來年便開始有轉機, 所以我對自己的人生充滿希望~

失業第四天~~

唉, 都係唔好諗咁多喇, 我話過我相信"命運"一定會對我有所安排, 我知道的一生一定不會平平淡淡咁度過~輕輕鬆鬆咁繼續過日子, 開開心心咁同女朋友去玩~~

問過價, 日版WII+多一set手掣要成$2400, 貴左D, 比得咁既價, 等反斗城有貨好過喇, 唔買住~

今晚嬤嬤果邊做節食飯, 在最後先比佢地知道我失業, 不過, 冇問題丫~
我表哥講得好 "你依家既學歷, 要轉工都唔會太困難丫"
嘻嘻~~~

失業第三天~

今早發惡夢夢見自己一個人食晒一隻德國咸豬手, 訓醒, 覺得好滯, 早餐都冇mood食~

同左呀媽講, 出左遣散果份糧, 只係比埋12月平時比開果個家用數, 佢欣然接受, 餘下的我可以袋袋平安, 今次佢總算似返個好媽媽~

間唔中都仲會有D心理上既徬徨, 始終希望自己仲係有份工, 咁就玩都可以玩得放D, 睇黎我都係唔抖得耐架喇, 辛苦命~

女朋友方面, 我經常同佢講"妳可以隨時嫌棄我架, 不如我地分手喇"講到佢都話煩, 其實我成日講 係因為驚佢到真係咁諗既時候, 唔好意思開聲, 與其到時夾硬一齊, 不如我一早講明, 唔駛大家心入面囉囉孿~~

今晚親戚上我屋企打邊爐, 好煩~

失業第二天~

今日遲左少少起身, 總係有一種唔知點既感覺~~

原來一份工, 唔單只可帶給自己生活的金錢, 還可以帶給自己一份安全感, 存在感~

我不可以失落, 我不應該徬徨, 因為 :

• 今次事件, 並不是終結, 相反, 是我事業黃金時期的開端
• 最重要的, 我並不是走到絕路, 我行的路是"命運"安排給我, 我只應該做好心理準備隨時把握"一些事情"的發生, 我相信斧底, 便能抽薪~

而事實上, 我確實感覺到我身邊隨時是有很多機會, 只係不是個個機會都是向著我.

短期, 我會期待命運為我安排的那個向著我的機會~

失業後第一天~

依舊早起~

始終失業唔同放假, 係會有多少不安的心情~

上facebook都見到好多同事在互相傾訴~

其實, 我最擔心既唔係我幾時搵到下一份工(因為我相信我正跟從命運的安排去走), 而係我身邊既人比我既壓力,

• 女朋友現在冇乜野, 但唔知過多一個月佢會點呢~~
• 我呀媽就不嬲都睇錢緊要, 口講話慢慢搵, 之後又加一句"乜都做住先喇", 從來聽佢講只係阻礙我個人發展~

失業了~~

三年的GE生涯, 在今天突然劃上句號~

雖說一直有所期待, 但殺到埋黎始終有多少失落感~

回想當年我剛入這公司, 感覺是自己高攀了, 因為當時我上一份工既人工係$6,695,
而呢度比到$8,000我, 以我讀完中七(AL只有一科合格)的qualification, 我覺得真係我既榮幸~
而且初時見到呢度既管理作風, 真係幾民主, 更覺得自己開始行好運~~

之後經歷了一次管理層變動, 管理作風改變了, 而我亦開始發覺繼續留在現有位置,
並無前途可言, 開始向各部門交涉, 結果我成功轉了部門......後來才感到是一個比本身更冇發展空間的部門~~

直至今天, 差不多全部門裁員~~

剩下的不是幸免的一群, 而是"執手尾"的一群, 最後結果相信都會是一樣~

總結, 我在GE工作其間所得到既, 以乎只有......一個大學學位~~
係咁多~

終於都黎喇......

今日突然收到email, 由黑鬼CEO秘書發出, 明天下午2點全公司開大會~

關於咩事, 我諗所有同事都心中有數~

不過我都有D想知, 究境係邊樣呢?
"執粒" "賣得出" "黑鬼辭職" "定係公報開始炒人, 想大家有定心理準備"

各同事都有唔同反應, 有D好似好興奮, 有D好似好擔心,
不過所有大粒坐房既都神色凝重~~

怕且今次都真係黎料喇~~

我? 興奮架, 話晒我話想走都講左成年, 咁樣結束, 都未嘗唔係好事~
起馬佢都賠返幾個月比我, 我仲可以專心搵工~

一個歷史性日子, 12月17日

果隻可能唔係小美~

今晚食完飯回家時, 見到有幾隻流浪貓在追逐, 我看到有隻有d似小美, 不過, 當我行近一點,
發現佢應該唔係~
我諗尋晚果隻都應該唔係佢~

希望有機會可以見到佢能夠同同伴玩得開開心心果個樣~~

傷心, 無奈的事件

星期日晚, 過婆婆家食飯中, 看見一隻被遺棄的小貓, 牠當時不停向路人哀叫, 我好像感覺到牠在說
"主人在哪裡?我好驚呀"
當時我見牠身體整潔, 不像一般流浪貓, 覺得幾得意, 影了一張相, 便走了~~

第二晚(星期一), 我又過去食飯, 途中又見到牠, 牠仍然在路邊, 一直看著路人, 由右至左, 好似在認人, 想認出自己的主人, 我登時心酸了~

天氣那麼冷, 一隻剛被遺棄的小貓, 仍在期待著主人的回來......

於是我把牠抱起帶回了家中暫放, 再回去婆婆處食飯, 晚飯其間同父母商量養牠與否, 因為 :
1. 我家中已有一貓
2. 間屋始終都係佢既, 寄人籬下就係咁

回到家中, 不幸地父母認為牠比預期中大隻(其實根本就係細貓, 只不過不是剛出生那種超微型),
而且可能他們不喜歡牠的毛色(灰黑斑紋), 不論牠如何撒嬌鳴叫, 他們拒絕了~

無奈之下, 看到牠見到我隻貓的貓糧時的反應, 我知道我能夠給牠的, 便只有一餐飽飯~

牠吃飽了, 我就無奈地把他抱回街上, 我盡可能把牠放至一處有流浪貓出沒, 間中亦會有善心人仕餵貓的小公園處, 望牠能從新學習另一種生活方式~~

其實, 由我把牠抱回家的一刻, 便已替他改了名字--小美

----------------------------------------------------------

昨晚(星期二), 我又係過去食飯, 途中刻意去看一看那小公園, 雖然不太清楚, 好似看到有一隻流浪貓和小美一起在地上吃東西(果然會有善心人餵貓).
當我吃飽飯回家時, 面前突然閃出一隻貓, 但因為他一出現, 附近剛好便有一小孩路過, 還作勢追牠, 牠便立即跑走了, 所以我看不太清楚牠是否小美, 但從毛色看, 應該是~
是小美是向我打招乎? 說牠已開始學習新的生活方式?

我不敢說牠會否感謝我, 因為我只和牠有"一飯之緣", 而並非真正拯救到佢~

希望牠真的能學到流浪貓的生活方式, 或者有好心人見牠樣子那麼可愛, 會帶牠回家養~~

對不起, 小美~~

在這裡衷心希望那些遺棄小動物, 甚至虐待小動物的人
"不得好死, 死無全屍"

2012......

昨晚上網看到有一西片名為"2012"即將上映,
再一次勾起在下對瑪雅預言的記憶, 即管上網search一下,
我看到一樣野, 所謂世界末日會發生的事和我前幾天所寫的"夢中的故事"有點相似.

1. 黑夜降臨後, 黎明不會再到來 (陽光不會再出現)
2. 人會自相殘殺 (少年被"人"追)

那種意境, 我絕對感受得到, 但是, 我感覺那種景象並不絕望,
也許會有部份(甚至大部份)人會死去, 但我相信, 世界、大家會以另一種方式存在下去~

有人說, 到時, 人類會再進化, 或許承受不了的人便會死去, 但承受得了的人, 就能夠生存下去,
(以下為在下的幻想)
而且, 那時人們的生活空間再不局限於"星球", 而是宇宙, 甚至更遠~
我們可以有機會了解宇宙究竟是何物, 人類的存在義意, 所謂"外星人", 到底是"人類" 還是其他星球的已進化存在~

我感到我是為那新世界而生的~命運, 對嗎?

幾時?

近期全公司同事只有一個問題 "幾時?"

現時咁既環境, 裁員就一定架喇, 真係差在幾時~

既然冇risk既野, 自然冇野好擔心, 我同另一位同事反而非常之期待果日既降臨, 因為會有唔錯既賠償~~

雖然係咁, 我仍然會將我的際遇交由"命運"去安排, 並期望我能把握"命運"給予的機會,
始終我對我既前路仍然充滿信心~

~~處之泰然, 安然面對~~

一個夢中的故事~

有一個少年, 他從沒見過甚麼世面, 只是很喜歡"陽光", 他乘船四處遊歷,(船是誰, 遊歷過甚麼地方等等, 詳情不清楚)
有一天, 黃昏時份, 他突然感到一陣強烈不安, 他感到今晚過後, 陽光將會離他而去, 日出將不會再出現, 所以他的船不停向著陽光將消失的方向駛去, 上到一陸地, 他亦繼續全速跑向一處高地~
最後, 日落了, 他一人靜靜地坐在位於高地的附近, 一塊凸出的石上~

他身旁有另一少年, 不知是因為相同理由而在這處, 還是本身便是居住在此~

似乎一股邪惡的力量已經降臨

突然, 在漆黑的環境之下, 一些手電筒的光芒出現, , 好像在狩獵晚間出沒的人一樣搖擺著~
喜歡陽光的少年被發現了, 來人以不懷好意的聲線叫喊, 另一少年卻即時對他說"冷靜下來, 不可動", 但陽光少年沒有理會, 全力飛奔, 穿過破鐵絲網下的洞, 穿過小樹林....

不知結果能否逃得掉??

~這時在下夢醒了~

生日~

今日係在下一年一度的生日~

雖然成日講人大左好似冇乜感覺, 但話晒都係自己既大日子,
點都應該放鬆一下, 諗下買D咩禮物送比自己先~~

尋日諗左樣野, 我唔會話自己條命好黑, 因為我相信,
好運同衰運都係一D abnormal既運, 宏觀黎睇, 冇話好定唔好
如果之前一直都係出現衰運, 往後有機會會出現好好既運~
所以我都好慶幸我一直都出現衰運~總好過一生平平無奇, 到時我就真係擔心~

"命運"呢樣野, 係每一個人都要經歷, 雖然我未明白佢既目的係乜,
但我既然生為人, 冇可以避免命運既操控, 對抗係愚蠢既行為~
我開始選擇"在命運安排之下, 等待並把握命運給予的機會, 發展自己的人生"
希望"命運"會認同我既理念~
(都係果句, 唔知我up乜就算, XD~)

食生日飯

今日同女朋友&一位生死之交食自助午餐, 好好味, 好高興~
小龍蝦個殼好大, 肉好細....
不過好好味, 蟹腳又近乎無限量供應~
正~~

......

• 幾日冇更新, 因為呢幾日好多野攪, 冇乜心情~

• 所謂多野攪, 攪乜呢, 其中一樣就係近排勁玩一隻game, 其實唔係一隻, 因為一套三集, 叫波斯王子(The Prince of Persia), 勁好玩, 未玩過就一定要試下, 不過記住用手掣玩, 用keyboard...咪玩喇~

• 個市應該要跌既時候又唔跌, 係咁炒消息咁小反彈, 買又冇乜肉食, 我會稱現時為"浪費時間期", 都係等兩三個月儲返D彈藥先再買~~現在安心期待在下的生日~~

• 自上星期開始, 我領悟到一點點東西, 就係光明正大唔一定係好事, 適量, 甚至大量咁收埋自己, 有時會更好, 不只可以令身邊的人捉摸不到你, 甚至"命運"亦不能捉摸到你, 不能夠不停地改變你身邊既環境去折磨你~(唔知我講乜就算喇^o^)

• 究境Annual Dinner有冇抽獎架? 早D知會一聲好喎, 好影響我決定去唔去架嘛~

面對現實(2)

• 雖然我之前講過話想轉工轉去某一個field, 但有時都要視乎環境、形勢, 當環境唔許可, 繼續盲目堅持某個目標, 只會不斷浪費時間, 或許有其他部門會更適合我, 而且亦有機會給我發展呢~~
  希望我今天所做的事, 可以成為我人生的轉捩點~

面對現實

• 睇黎我真係要面對現實, 兩個人相處, 邊個搵得錢多, 就會有絕對既權勢, 包括:
  
  1. "我唔怕你唔要我, 因為我搵錢多過你"
  2. 心情唔好時可以隨時句句窒住晒, 你講乜都係錯, 佢就乜都"要"係啱~
  
  咁就一世!?
  我真係冇得揀!?
  假如到我有錢既時侯, 我用咁既態度對佢, 那時我就會變成一個衰男人?
  全部都係我一個人錯晒? 其他人一D責任都冇?
  如果現實就係咁, 我諗對方會希望我呢世都唔好有錢過佢~

• 突然有個感覺, 屬於我人生的最低潮終於到了~(等左你好耐)

"要返工的"星期六

• 今個星期六要返工(長短短週), 公司附近開左間KFC, 諗住死慳死抵買個早餐食下喇(100%持股, 係咁上下), 不過返到公司, 一坐低左就懶得再落街買野食, 結果, 慳返十幾蚊~
  

• 今朝上openrice睇, 帝苑酒店的雅苑軒11月繼續有自助餐coupon, 適逢今個月是在下的生日, 即時約定在16號與兩位在下人生最重要既朋友(一位係女朋友, 一位係男性生死之交)共進午餐~~當然係我請客~~生日, 與其要朋友傷腦筋諗送咩比你/請食飯, 不如我請人食飯, 大家開開心心仲好, 我請又開心, 朋友又食得開心~
  ~這是我的人生哲學~

• 美國就黎選總統, 個人比較喜歡奧巴馬, 並不是因詳細睇過佢d政策, 事實上我只能在新聞報導上認識呢個人, 但佢比我感覺係立場堅定, 言談得體, 表現冷靜, 絕對有成為總統的魅力, 佢係一個有"總統格"既人;相反, 麥凱因, 在好早時期我已經感覺到佢"技窮", 他不停地從不同角度去攻擊對手, 呢招唔得, 就下一招, 比我感覺佢好cheap~ 選舉係要出d手段, 呢點我明, 但係最差就係比人睇穿晒你既動機而覺得你cheap, 好似奧巴馬咁, 暫停宣傳兩日去探望外婆呢招打溫情牌, 做得幾好, 好多人受落~
  期待香港時間星期三(美國11月4日)

"終於到達"星期五

• 之前報過一個名為Lending Risk & Bank Credit Management既短期course, 一直我都視呢個course為興趣班, 性質就同焗蛋糕or織冷衫既班差不多, 不過總算係我渴望轉職那個範疇, 所以同同事一齊報黎讀, 不過全程都係輕輕鬆鬆, 冇乜壓力(但唔知點解D同事好緊張^_^")~~~~昨晚收到Final成績
  A-
  下!? 果然只係興趣班, 皆大歡喜~~

• 今晚係一年一度既萬聖節, 不過, 在下一D感覺都沒有, 曾幾何時, 香港人根本對萬聖節毫無感覺, 好像是自從97年金融風暴過後, 好多人都開始搵藉口黎乜都慶祝一番, 現在已經變到好似一個大日子咁....無奈
  始終, 我對盂籣節的感覺還是大一些 XP

• 我對某人的態度開始有D不滿~
  

• 繼續無責任亂估 :
  股市會開始在11000以上徘徊, 幅度大約二千點左右(即係萬二, 三左右), 歷時大約半年~~
  如果再跌穿, 即係點? 咪即係我估錯囉~~XD~
  都係果句, 有鬆動錢就會買, 短線黎講, 呢段波幅期可以玩 ; 長線黎講, 依家買=穩賺!!
  再講多次, 以上只係個人冇根據靠估, 千萬不可作為投資參考~~

小窮神隨筆~

今早在公司, 再一次感受到自己的無力~
亦再一次証明, 運, 的確係最緊要的~
有運的人, 廢物亦可以當高層
冇運的人, 壯苗亦可以作泥塵

今日終於托朋友問到一條保証正貨既靚綠幽靈水晶手鍊要幾錢,
答案係"千零蚊左右", 哇, 乜咁貴既咩, 其實係咪真係有用架?
我諗呢樣野根本唔會有人答到我~信則有, 不信則冇~ 我信

今日個市再升千六點, 本人無責任預測 : 底應該已經出現,
不過黎緊一段時間都係不停上落上落, 掂底唔一定只有一次既~
所以都係一有鬆動錢就會入市, 始終呢段週期, 絕對係入市既最適當時期~

放工買返張六合彩電腦飛先, 曾經同自己講過, 唔會沉迷落任何賭博(唔好同我講買股票係賭緊錢, 我會恥笑你), 而六合彩, 亦只會於金多寶超過二千萬時下注, 且亦只限買一張電腦, 呢個係我既原則~

簡單介紹~

在下今年27歲, 在一間各高層們不停聲稱自己是國際大企業(其實只係國際大企業其中一種業務的其中一個區域的分支)的公司處工作, 低層一名~~
今年年頭完成學位課程後, 便一直尋求轉職機會, 但無奈事與願違, 一直未能成功, 或許是目標範疇比較少空缺, 現在再適逢百年難得一見的金融海嘯, 轉工更是無望~~

在金融海嘯衝擊下, 在下毅然入市, 只因在下相信兩點 :
1. 經濟周期, 跌完就會升, 升完就會跌, 跌的時候正是買的時候, 升的時候......在下沒勇氣高追~
2. 有人問"唔等跌多D先買?", 試問邊個會知幾時係底? 錢係賺唔盡既, 當我在跌市時分段買入, 一升市便會有所斬獲(賬面上), 那時勸我不要買的人, 分分鐘還在考慮幾時買~~~~

往後在下會不時在這裏分享一下自己遇到的事情及感受, 敬請期待~~